Dve rali zmeržnjenoga jognja | Tomislav Ribić

BICIKLISTI

pelamo se na biciklini
Gaga je japi vkral tri cigarete
pelamo se na biciklini
Gaga i Branko na japini
ja na biciklu kaj ga je Nenad prerasel ter sem ga ja dobil
pelamo se, ne daleč, po Kumičičovi zpram Drave
do pervoga kuruzišča
hičemo bicikle v travu
zajdemo med visoka zelena betva kuruze
Gaga nam vužiže cigarete, drempavo, z šibicom
nigdo nas ne vidi
popoldnan je, potlam pet
vsi su doma
povlačimo dim za dimom
znad nas indijanski signali ideju polehko
v lov na oblake
Winnetou ih pošila brači
bledoliki spiju potlam posla
vezda sme velki v svojim jočmi
peti razred pučke škole
smerdimo po tobaku
persti su žuti
kaj bumo se doma zlagali
čkomel bum i delal se bedast
ma kaj bi ja pušil
dobro sem prešel
jedino je Gaga bil bit
japi su zvečer zfaleli cigaretlini

BILJEŠKE

betva – stabljika; drempavo – nespretno, nezgrapno