Dve rali zmeržnjenoga jognja | Tomislav Ribić

SOBA ZA SPOTIRANJE MERTVIH REČI

beli prah nosiju tri krala / bludiju po orsagu od pet, šest rali / nosiju betega koren / bitek vničen, vmoren / žveplaju vino z svetega Grala / v hiži lotrije ni cesarskoga bala / meštri su zvlekli hude meštrije / vino cikne v oštarije / vekivečni himbeniki / kerv pretačeju v pivnici / vmivaju nad kadaveri roke / se skrivaju z lepim rečmi / popevka brez glasov, pelinvoda, kesni film/ černi kajzer po cesti hodi ter „gledi kak igla išče još jenoga“

ne čutiš več sebe v sebi
čkomina postaje tvoje ime
drakonidi sipiju z punikvi vesmira
prevračaju se v kristale i spiju vu vejami tvojih rok
jutro ti nosi korunu od mraza
zaklenul si vrata sobe i ve se skrivaš
kmica zida saminu, zlatna kača ruje po venami
čemerljivost se gnezdi v kervi
krič z druge sobe gubi se v tebi
plimu v telu čutiš, to več nesi ti
červi grizeju možđane, žulja te vsaka misel
labirint vu vuhu se zapira, zvuk v endolimfi se topi
telo ti deršče
prah smerti nosiš na dlani noči
denevir igra bobnje v tvoji sobi
premeče te po posteli
ponorela misel nemre najti reči
hude slike zviraju odvsikud, nemiri se rojiju
reči letiju kak ose okoli tebe
mečeš se za njimi po podu, loviš ih z rokami, gutaš
zaletavaju se v kmicu
nigdo ih nemre posložiti nazaj
spotiraju se po zidi od samine
kristali noriju v telu
kervava šprica leži na podu
v beli sobi budi se smert

BILJEŠKE

orsag – država; bitek – bivstvo; lotar – zločinac; oštarija – krčma; himbenik – obmanitelj; kadaver – lešina; denevir – sablast; samina – samoća; gledi kak igla išče još jenega – prepjev stiha I watched the needle take another man (N. Young); Needle and the Damage Done – pjesma Neil Younga iz 1972. s albuma Harvest; drakonidi – meteorski roj kojemu je radijant u zviježđu Zmaja; zlata kača – asocijacija na zlatni šut (overdose); punikve – vrtače; krič z druge sobe – dio stiha iz pjesme grupe Indexi – Plima (S. Kovačević); čemerljivost – depresija