Dve rali zmeržnjenoga jognja | Tomislav Ribić

ŠKARNICLI ZA RAČUNE

tam v Šebovom štacunu na vuglu Optujske
moglo se kupiti šezdesetih let vse na deke
i cukore i kekse, i melu i cukor
mati bi navek cukore stresla v zdelicu a škarnicl dela
v ladicu kredenca z čitabam, računi i penezi
čuvala bi škarnicle i v njih pospravlala račune gda bi ih platila
i one koje bu platila
ter je z tintenblajkom napisala na škarnicl
plačeni računi
sedeli bi v kuhnji
pila bi polehko černu kavu
ja bi namakal pol žemle v lonček z belom kavom od Divke ili Kneippa
i igral se na stolu z gumenim magaši
vse je bilo kot vusporeni film
negda me te slike zbudiju v noči
zavlečeju se v me i razlejeju kot reka v protuletje
gda nosi vse pred sebom
i beteg kaj je mati dugo nosila v sebi
i hižu kotere več ni
i ljudi koterih več ni
sam naš stol ze zeleni štokrli stoji nasred verta
vsi sedimo za njim, i živi i mertvi i spominamo se

BILJEŠKE

čitaba – dokument; tintenblajka – olovka čiji vrh bi se trebao prije pisanja namočiti; Divka i Kneipp – Franckov prženi ječam i korijen cikorije koji se dodaje u mlijeko (popularan u 60-im godinama); magaši – patuljci; beteg – bolest