Dve rali zmeržnjenoga jognja | Tomislav Ribić

PSIHODELIČNI GNOM V ODKRIVENJU BITKA

pred zorju se pomikaju zidi sobe / zamusikani ajngeli lučeju čez plave obloke / tiščeju te z bitja vun / glasi lajharov i tatov mešaju se v kotlu dena / neonski veter pomeče misel / spod merzle postele od listja kušencija se skriva / nepoterplivi maloši šepečeju pripoved o zgublenoj kralevni / hrepenjenje išče svetlost vu kmici / z žoltara srebro se rodi

ti, puščenica zabludela v kafkijadi
zmešali su ti miseli, sprepleli i zavuzlali
čutiš kak ti zemla opada prek glave
v glubini se gubi bitek vsega
bolno je otkrivenje gda strahi te razvlačiju
živu te zakapaju
čutiš kak ti zemla opada prek glave
kakofonija glasov v tebi budi psihodeličnoga gnoma
iskali su od tebe zveličenje kaj su te zaposlili
žmiriš i čkomiš v hibernaciji
nigdo neče videti, neče čuti kaj su ti delali
šopaju te z tabletam, devaš si plastičnu margaretu v lasi
čutiš kak ti zemla opada prek glave
hodiš po varašu, sam se smeješ
si to ti, gdo to v tebi ve spi
tvoj jauk je nečujen v morju kričov
jagmiju od tebe reči, miseli
čutiš kak ti zemla opada prek glave
plavaš v kmici psihodelije špitalske sobe
jutro vmira pod oblokom

BILJEŠKE

lajhar – prevarant; kušencija – savjest; nepoterplivi – nestrpljivi; maloš – patuljak; puščenik – pustinjak; čutiš kak ti zemla opada prek glave – slobodan prijevod stiha Oh Mother, I can feel the soil falling over my head (Morissey; J. Marr) – I Know it’s Over – pjesma grupe The Smiths iz 1985.; kafkijada – svijet F. Kafke; jagmiju – otimaju