Dve rali zmeržnjenoga jognja | Tomislav Ribić

ONI NA PERIFERIJI

oni na periferiji glediju na kalendaru
gda bu pervi v mesecu
imaju retke svetke i posne petke
oni na periferiji ne delaju v kancelariji
če imaju sreče zaposliju se v fabriki
v četrtek prodavaju na staroj krami
spotrgane dele sebe
v malim verti sejeju radost
susedima prek plota hitiju šalatu
kaj ne v seme odišla
v protuletje zubačiju listje vu vertu
ter ga kuriju
piliju derva za zimu i tegliju ih v šupu
oni na periferiji
čakaju nedelnu hostiju
čutim njihovu duhu gda režeju sverži lešniku
rušiju posušenu susedovu črešnju
da bi imeli kurjavu za zimu
v jočmi nosiju jesenske megle
oni na periferiju išče hraniju piceke
kokoši im neseju jajca
ne ih strah dekretov ni komunalnih redarov
imaju po par zajcov i praznu kerletku za ptice
imaju maloga cucka kaj kopa po šupi
venec češnjaka obešen na štoku
oni na periferiji ne nosiju ancuge
imaju sam jen v koterom ih buju pokopali
luftaju ga na štriku v protuletje
oni na periferij po letu deneju stol pod oreh v dvorišču
i spominaju se naglas z prijateli vse dok ih komarci fest ne spikaju
noge si pred večer potlam dela opereju na pumpi vu vertu
one na periferiji ne zanimaju knige ni novine
nisu preveč vučeni al imaju serce i volu
susedu vert preštihati, popraviti lesu
ne baviju se z politikom
ni na periferiji sadiju zvezde i deliju njihove flance
grejeju si serca na toplomu kruhu
i tergaju koricu, svadiju se i smejeju za njom
oni na periferiji imaju svete sličice po sobam
najže i pelnice pune vuspomen
oni živiju v popevkam Drageca, Arsena i Zvonka

BILJEŠKE

sverž – grana; kurjava – ogrjev; živiju vu popovekama Drageca, Arsena i Zvonka – Drago Britvić, Arsen Dedić i Zvonko Špišić