Dve rali zmeržnjenoga jognja | Tomislav Ribić

SENJA II

pred zorju gibaju se zidi sobe
zamusikani ajngeli lučeju čez plave obloke
tiskaju me z bitja vun
glasi lajharov i tatov mešaju se v kotlu dneva
neonski veter pomeče misel
spod merzle postele od listja sumra se skriva
nestrplivi maloši šepečeju
pripoved o zgublenomu kralevstvu
hrepenenje išče svetlost vu vodi
z žoltara srebro se razlije
jalnuš skriva glas hamižen
gdo to vmira pod križom
na beli risi zgaženi cucek metalni oroslani raznašaju čreva
po mertvi cestam
černe flundre lajeju na mesec
nevidinčiči putujejo čez sive oblake
sprali bi žuč z lica zemle
ter stepaju pelinsneg
na peklare, fakine, kavrane
na maloše, herčka i kerta

zgubila se cesta, zgubil se lucki obraz
gde je ve bitek, gda nas ščipa mraz

BILJEŠKE

nevidinčič – duša nekrštenog, nezakonitog djeteta, ubijenog u porodu ili još u majčinoj utrobi, koja noćima luta svijetom u obliku svijetleće kugle tražeći izbavljenje, smirenje; senja II, Recital suvremenog kajkavskog pjesništva „Dragutin Domjanić“, Zelina 2012., 3. nagrada