Dve rali zmeržnjenoga jognja | Tomislav Ribić

ARSEN V DOMU ŽELEZNIČAROV ZA GIMNAZIJALCE PROTULETJE 1976.

probam se zmisliti kak je prešel koncert Arsena v Domu železničarov v protuletje 1976., koncert Arsen za gimnazijalce
nikak se nemrem zmisliti koncerta
vse se je zgodilo za čas, došel je i napunil nas z nečim dedićovskim
z Arsenom
zmislim se, prešel je na berzinu poleg mene: černe samterice, černa robača, temne očale
černi klavir na bini, pun Dom železničarov, sreda, popoldan okoli šest
stajal sem naslonjen na zid, zmislim se kak je prešel poleg mene i ve
imam totalni raspad sistema v glavi, začernjenje
Ponovo ti govorim, probam se zmisliti koncerta, vertim film v glavi, sam se zmislim kak je Arsen berzo vušel v Dom železničarov, ne zmislim se ni gda je zišel
bojim se pozabe kaj se budi v meni
zmislim se sam da je bil Arsen
vse je bilo tak svečano, tiho, električno kak i gda su nas primali v pionire
il gda sme posle perve pričesti dobili zagrebečke kremšnite z šlagom i čokoladom
morti nas je hipnotizeral pa se je smejal na bini i pripovedal vice samome sebi
morti je bil sam njegov hologram, Arsen kak Arsen, Arsen od kartona, Arsenov plakat
Arsen kak Homo volans
Arsen kak Mirni podstanar
Arsen kak Moj brat
Arsen kak ja
Arsen ni zišel vun
čutim da je ostal tu
v meni zanavek

BILJEŠKE

Ponovo ti govorim, Mirni podstanar – pjesme Arsena Dedića s albuma Homo volans iz 1973. prvog dvostrukog konceptualnog albuma; Moj brat – pjesma A. Dedića s albuma Čovjek kao ja iz 1970.