Dve rali zmeržnjenoga jognja | Tomislav Ribić

JUTRO V HOSTI (MUDDY WATERS IGRA BLUES ZA ZGUBLENE DUŠE)

Jezuš i ja hodimo čez juternju hostu i poslušamo ptiče
moja tenja me išče (kak da nje je negdo vkral joči)
veje topola delaju ladovinu
vilinske lasi letiju po zraku
pavučina zaplete roke
poslušamo bluz kaj dohaja z reke
znad nas letiju otoki prevrčujuči se v oblake
v šašu šljuke, divlje guske, neznane ptice vseposud
černojočnik šlepa oblake do reke
lovi reči zabludelih ajngelov nad starim betonskim bunkeri
potapla ih v nedoživetim senjam prerano zaspalih dečecov, harcerov
dva-tri persta spod jalove ponjave zemljene spiju tenje zgublenih duš
zazivajuči Jezuša
žuti se steza sposušene trave, dom klopca kaj senja da bu postal čverček
polehko se prevlačimo čez šaš rudi kak smert
nosim molitvu v sebi za zagublene kriče mertvih kaj zviraju okoli nas
summer time v plavičastomu odhajanju stepa jesen z kreluti
raštrojene senje loviju se po ternju na kaputu obale
zapletene v srebrni plašč pavučine
čuje se le vusna harmonika: muči me, tak sem žalosten…
Muddy Waters igra blues za zgublene duše

BILJEŠKE

Trouble in mind, and I’m blue… I’m going down to the river – muči me, tak sem žalosten, idem do reke (Richard M. Jones) – pjesma M. Watersa Trouble in Mind iz 1966.; Muddy Waters – američki blues glazbenik; hosta – šuma, mjesto duhovnog pročišćenja, sklada, katarze, suživljavanja čovjeka s prirodom; čverček – cvrčak; summer time – ljetno doba; bunkeri – misli se na bunkere u Dravskoj šumi iz II. svjetskog rata i grobišta stradalih; tenja – sjenka; rudi – gusti