Dve rali zmeržnjenoga jognja | Tomislav Ribić

THE LAST WALTZ KINA PARK

they say everything can be replaced
they say every distance is not near
so I remember every face
of every man who put me here
Bob Dylan, I Shall Be Released

senjal sem film The Last Waltz kaj je igral v kinu Park
dokumentarni film, rock koncert
v filmu so nastupali: The Band, Bob Dylan, Neil Young, Joni Mitchell, Van Morrison, The Staple Singers, Eric Clapton, Ronnie Wood, Neil Diamond, Ronnie Hawkins, Paul Butterfield, Bobby Charles, Dr. John, Ringo Star, Muddy Waters, Emmylou Harris; ter vitiznanci: Lawrence Ferlinghetti, Lenore Kandel, Diane di Prima, Michale McClure, Robert Duncan i Frewheehlin Frank
režiser filma je Martin Scorsese
film je snimlen 25. 11. 1976. v dvorani Winterland Balroom, San Francisco, a ja sem senjal da je bil v kinu Park
senjal sem film The Last Waltz
film je igral v kinu Park vu varašu leta 1980., v redu pred menom sedeli su Kiki i Vidica

stara sinagoga z klimavim drvenim redi, z stolicam kaj su celo vreme sam škripale, bila je kino Park do devedesetih let; ponegda su tam bile pupačkarske predstave i par dečjih filmov kaj sme ih išli glet z pučkom školom potlam kak su zaperli pionirsko kino v Šenoinoj vulici; v kino Park sem išel z Edijem glet filme kaj nisu bili nedelna matineja; pervi film kaj sme išli glet bil je Francuska veza Williama Friedkina z Geneom Hackmanom tam negde v protuletje 1973.; film je zišel v leto 1971. tih let sme morali čakati vsaki novi film, vsaku novu ploču okoli jeno leto jer je distributerim bilo falejše otkupiti stare filme, stare ploče; v tem kinu gledeli sme i Lennya z Dustinom Hoffmanom, Let znad kukovačkog gnezda z Jack Nicolsonom i Louise Fletcher kotere sme fučkali gda goder bi se pokazala, Kinesku četvrt, Divjega bika, New York, New York, Hair, Čuvara plaže v zimskomu periodu, Kum I i Kum II, Gdo popeva, hudo ne misli, Jesus Christ Superstar, Sladoled od limuna, Doživetja perača oblokov; pervu pucu sem pelal v to kino glet francuski film Rođak, rođakinja; v tem kinu sem gledel film The Last Waltz, oproštajni koncert grupe The Band; cajti se nemreju vernuti, kino Park ni več kino, nazaj je sinagoga, ostaje sam glazba i filmska traka; gda goder prejdem poleg kina Park zmislim se sedemdesetih let i filmov na koterim sem odraščal

BILJEŠKA

I Shall Be Released – pjesma Boba Dylana iz 1968. ujedno i završna pjesma u filmu