Dve rali zmeržnjenoga jognja | Tomislav Ribić

GALŽENJAKI RASTEJU V HOSTI

kaj ih je mučilo / kaj ih je morilo / kaj ih je nateralo / kotera sila ih je zela / kaj se je preobernulo v mislih / klatiju se na tenkim soham / ve su kot duhi / kot veje sposušene / njišeju se / po njimi semenke platan opadaju / poslušaju sam sove huk /nočni muk kole šum ponorele reke / „na cesti poleg hoste veneju neveste za muže“

hodimo po hoste
sledimo trage
iščemo Pereka
zginul je, ni ga najti
hodimo polehko
ptiči lučeju z gnezda
kak da se hosta skriva pred nami
hodimo, gledimo okoli
a znad nas zeleni obloki hoste
odpiraju se na mestim gde
štriki visiju po soham
njišeju se tela
Pereka, Nenija i Tončeka
morje tel zaziva Jezuša
galženjaki obernutih joči iščeju zveličenje
veter merličnjak ih njiše
cipele im opale, ve su hiža mišu
njišeju se odpretih vust
ne puščaju glase
zgašnjene joči oblakem su dom

BILJEŠKE

galženjak – obješenjak; morilo – mučilo; merličnjak – živi mrtvac; Perek, Neno, Tonček – mladi susjedi koji su se objesili; a na cesti… – slobodna interpretacija stiha zraven ceste rastejo, neveste, za može – pjesme Rastemo slovenskog kantautora Marka Brecelja s festivala Opatija 1974., s albuma Coctail, 1974.