Dve rali zmeržnjenoga jognja | Tomislav Ribić

SAMINA GREBE PO OBLOKI SERCA

samina je kaput koteri nosiš
Loneliness is the coat you wear
Bob Crewe; Bob Gaudio, The Sun Ain’t Gonna Shine (Anymore)

gdeno mi se čini da samina grebe po obloku v svoji breztelesnosti
zakaj si znovič tu, pitam ju
samina čkomi navek, zavleče se v glubine možđanov
ona nema reči, ona je kot nevidlivi plašč kaj prekrije tvoje bistvuvanje
predi neg zima zapre svet pod jenim krovom pa sumra začne klicati
z božičnom šenicom
gdo si, pitam ju
si kniga koju hočem pročitati sam da te otiram, a nejde
(mati veli: samina je pes na vuglu)
gda te čutim znam gdo si
ti si čkomina v sobi
žulj na sercu
čemerna hiža kaj skriva mokre zide, mesto počinka senca mertvih
gripa, ospice, roka v gipsu
se si v istom času: mladost, starost
imaš parkle pozoja
giftaš misel
vugibam se od tebe, a nemam kam
nemam sobu za pobeg
nudiš mi svojo goloto da mi dotikava telo
glođeš me do kosti
(se mi zgledi da gdagda kak vuk samotnjak šanta po puščave duha)

BILJEŠKE

The Sun Ain’t Gonna Shine (Anymore) – pjesma grupe The Walkers Brothers iz 1966.; gdeno – ponekad; sumra – tjeskoba; šanta – šepa