Dve rali zmeržnjenoga jognja | Tomislav Ribić

GRIPA SE ZAVLEKLA ZE ZIMOM POD TUHICU I IGRALA SE PING PONG Z MENOM V SAMINI PRED MATURU

znovič imam gripu
vleče se od Božiča
postela je fajtna
spim z ručnikom pod glavom
temperatura ne opada
Novo leto je prešlo
slavil sem v posteli, sam na plus 39
društvo je slavilo brez mene v gimnazijskem Klubu V3
Anica i Zdenka su rekle da je bilo čist dobro
sam je Edo došel poglet kak sem
čemernost me zakapa pod tuhicu
poslušam Wingse, Mull of Kintyre
(prešel je po vresku kot jelen po dolu
vernul me nazaj v stare lepe dneve)
mater se nalukne v sobu z šalicom čaja
nosi lek, toplomer
gda otide narašim vuglen i stresem pepel v plehnatu posudu
potlam posudu prevrnem v železnu kantu pod oblokom
hitim par komadov vuglena, zluftam sobu, naslonim se na topli kamin
čaporki se srebriju v ranomu jutru, debele, duge, špičaste
gulim naračinu koru i devam na kamin da se zapeče i lepo diši
dva tedna v grudenu, celo zimsko ferje v posteli
pokrijem se prek glave
mužika z radija dela mi društvo
kokoš kokodače na dvorišču
čitam znova stari broj magazina Džuboks
prelistavam likovnu enciklopediju
stari nemški Knaurs leksikon
knige kaj mi nosiju lepše senje
pobegel bi nekam čez oblok
(a kam, ne znam ni sam kam)
vse je sivomegleno, led je pustil korenje, skriva vulice
nigde nikoga, sam stare susede posipaju pepel pred hižam
boli me gerlo, suho je
povelečem hračka, odprem oblok
i hračnem daleč na čisti sneg
zmerim z jokom, dva metra, dva i pol metra
smejem se kajti zgledi kot šnenokrl
na beloj ponjavi dvorišča

BILJEŠKA

prešel je po vresku… – slobodni prepjev stihova sweep through the heather like deer in the glen carry me back to the days I knew then – pjesma Mull of Kintyre (P. McCartney; D. Laine) grupe The Wings iz 1977.