Dve rali zmeržnjenoga jognja | Tomislav Ribić

ŽIVLENJA KRUG

ozremo se ni poti nazaj, odraščamo od malih nog,
kar vrti se vekomaj, je življenja krog
Jonie Mitchell; prepeval D. Velkaverh, The Circle Game

teca Saša nam je došla reči da ide na morje z Nenadom kajti on išče ni videl morja
došla se oprostiti od matere
rekla je da nema ravno nekaj od obleke
mater je odperla ormar i dala nje da si zbere par letnih kikli
teca Saša je z mamom delala v SDK i negdar je bila podstanarka v hiži prek nas
tam pri Končiju Levaniču, trgovačkom putniku za knige, kaj se nigdar ni oženil i vmerl je sam ter su ga potlam tri dni našli mertvoga (isto kak i pervu susedu i njejnoga sina)
teca Saša nam je došla reči da si na poslu moreju naručiti zimnicu od nekakove fabrike Podgorka i da ima vsega i vsačega: kiselih vugorkov, paprike, mešane kisele šalate
dobila bu to na rate ter če mati hoče zela bu i za nas
teca Saša je došla reči da si je našla nekakovoga ne znam kaj, nekakovog umetnika, šoca, slikara, na morju, pozvala ga je da dojde na teden k nje pa če more dopelala bi ga k nam
mater je pripravila večeru za se njih
teca Saša je došla na kavu, sama, letna ljubav je skončala ze zimom
donesla je materi sliku Stari grad kaj ju je naslikala Sašina sestra, slikarica
materi je bilo nezgodno ter nje je ona naredila da ju zeme kajti da nekaj od nje mora imeti, a ona ne vse nosila z sebom v grob, ionak ima išče dve
Mirine slike
teca Saša je došla predvečer k nam, pozvala nas je na kersnu slavu
tam je mati donesla flašu vina, bajadere i kavu kajti je red nekaj donesti
teca Saša ionak bu z Nenadom došla za Božič k nam na puricu z mlinci, Ferenc József kifle, salovnjake i Linzer tortu i tak se je vsako leto zapiral išče jen živlenja krug z tecom Sašom i trampami biciklov, vertnih stolic, zimnice, vertnih malošov, gozbi
teca Saša je došla z Nenadom po mati da odidemo vsi skupa do Habulanke da im zaštopa najlonke, išel je i japa, čakal nas je vuni pa sme se išče zprešpancerali po Staromu gradu gde nas je poslikal
jene večeri teca Saša je javila da je Nenad vmerl v automobilski nesreči
teca Sašu sem zadnjič videl pri vatrogasnomu domu, v rano subotnje jutro, skuševali sme se i razišli, ja sem z biciklom odišel na sejmišče, a ona je odšepesela zpram placa
preletiju tak v glavi slike čerlenoga bicikla Pionir kaj sem ga nasledil gda ga je Nenad prerasel, slike njegovih vest i hlač, pervih Playboyov kaj ih je nabavil, odraščanja v njegove obleke, v obleki kaj ih je vsako leto dovlekla Babuška
vsi ti liki i vse te slike vertiju se nenadeano
leta su prešla kot ptice prek neba v jesen
vsimi se je vre zdavna odvertel živlenja krug

BILJEŠKE

The Circle Game – Živlenja krog, pjesma Jonie Mitchell s albuma Ladies of The Canyon iz 1970., nadahnuti prepjev pjesme D. Velkaverha, jednog od najznačajnijih slovenskih tekstopisaca, za Necu Falk iz 2000., pjesma je objavljena na albumu Živlenja krog; nenadeano – nenadano