Dve rali zmeržnjenoga jognja | Tomislav Ribić

PUT V ZIMU

četiri je zjutra, konec grudena…

došli buju, govorila je mati
došli buju fačuki
i odnesli buju na sever slike brezskerbnih dnevov
nestali buju im tragi prekriti z listjem beline
veter bu vtihnul naše glase i prevračal ih v kristale
osluškivali bumo šepet snega v sobam od leda
bojali se kmice
jednoga dena, gda se zbudiš, duha bu zginula v korenu repe
nosnice buju suhe
a znaš da pes suhih nosnic ni zdravi pes
došla bu zima, odjemput, nepozvana, ledena i duga
donesla bu dugocajtje
cepal buš dreva v šupi i očutil leta v križi
kaj te polehko vlečeju k zemli
nokti ti buju pričeli menjati farbu od indigo na černu
koža bu ti se listala, ostala suha, spucana
gift bu se vlekel po zglobi
tvoja pripoved bu zestala, slike i svet buju vtihnuli v hipu
pamtil buš sam zadnju sliku
kamion stoji na cesti, dečec rivlje triciklin
susedi pripovedaju pred haustorom
ternac čaka protuletje
roke ti se predajeju na putu za sever
gda merzlina proredi tvoju misel
vse postaje bela senja
v tvojimi lasi

BILJEŠKE

četiri je zjutra… – slobodni prepjev stiha It’s four in the morning, the end of December… pjesme Leonarda Cohena Famous Blue Raincoat iz 1971.; gruden – prosinac; dugocajtje – dosada; brezskerbni – bezbrižni; prekriti – zameteni; gift – otrov; hip – tren