Dve rali zmeržnjenoga jognja | Tomislav Ribić

OREH VU VUNZHAJANJU

prigibaš se zemli z strgani rokami
kosti ti opadaju kot kometi z nebes
gerliš žuto listje
joči su ti suhe, zaperte
lasi opadaju
skuplam ih za kres, ter se naslonim na tebe
i gledim skupaj z tebum v noči zvezde kak se zavlečeju v tvoj sposušeni kostur
i šepečeju o dnevi gda si bil mladi i zdravi oreh

(gdagda se veter zaplete v njegove lasi i donese nemire v senje o plodnim leti i velkim zdravim orehi z koterim nas je gostil predi neg je dopetnul nebo pa senja o svoji mladosti: o Woodstocku na vertu gda je sused igral bubnje i pripovedal kak je delil sobu v Istambulu z Jimmyjem Hendrixom, kak mu je Jimmy dal persten z velkim čerlenim jokom; o žitku i smerti, o letu lubavi 1968., o pucki i belom zajčeku kaj ga je navek nesla z sebom, onem rockerskom White Rabbitu z popevke Jefferson Airplanea, a največ o mojem odraščanju z njim, o našem korenju kaj je v te zemle zprepleteno)

gledim te v dimu kaj raste daleč v nebesa v nekakovem meglenom vunzhajanju
gda postane nevidljiv mojemu joku i stopi se z noči
gledim te i čutim reči proroka:

za se postoji vreme, vreme za vsaku stvar spod nebesa: vreme za rođenje i vreme za vmiranje; vreme za saditi i vreme za zpuknuti ono kaj je posađeno, vreme za vmoriti, vreme za zlečiti

Izaija 3, 1-8

morti tvoja toplina greje ve zvezde
na tvojem mestu ostaje sam svetli krug žeravki
kak da se vulkanska lava zlejala v te mali krug
i čmiži i čmiži i pred jutro zgledi kak da zvezde spiju na černemu morju
kak da je celi vesmir zišel v te krug žitka
vse doklam ga juternja rosa ne prekrije z sedefom

BILJEŠKE

oreh – simbol za drvo života; vunzhajanje – izlaz, egzodus; Woodstock – trodnevni koncert, 1969. g.; Jimmy Hendrix – američki rock gitarist; za vse postoji vreme – stihove uglazbio Pete Seeger, folk ikona, 1959. u pjesmi Turn, Turn, Turn (najpoznatija u izvedbi grupe The Byrds); čmiži – tinja; gdagda – ponekad