Dve rali zmeržnjenoga jognja | Tomislav Ribić

SLON I JA, SUBOTA V MORJU JOGNJA

Morti je ovi svet pekel nekoga drugoga planeta.
Aldous Leonard Huxley

Slon i ja idemo polehko doma po Trenkovi vulici
novo školsko leto je začelo
ričemo kamenje
stojimo pod drevi divlega kostajna, velkim
kot divi z debeli rokam
beremo kostajne, dva-tri za školu
ter polehko idemo dale
dim se prevrnul v oblake
val jognja oberče se v zraku
čerleni jeziki ližeju sonce
Slonu su doma sam babica i mali brat
dogovaramo se za popoldan
vatrogasna sirena para misel
negdi gori, hudo gori…

(kerv v možđani gori, varaš gori, Sveti Florijan zvoni, z plamtečom plahtom Hudi nad varašom nori / ti prekleti tolvaj i tat koterega su skoro na križ pri Rudi raspeli ve se fantuješ kaj su te zlemali, kokošar fantlivi pravicu kroji siromaku / v žveplenom bednju kuha, meša jognjenu juhu ter kuri / jogenj je na parmi vužgal i pobegel)

Slon i ja idemo polehko doma po Trenkovi vulici
došel bu popoldna k meni
ričemo kamenje, idemo poglet gde gori
stojimo pred Slonovo lesom
tisuč jezikov govori
tisuč jezikov liže Slonovu sobu, štalu, senik, pajceke
nigdo nemre živinu vun več pustiti, zvleči
grede opadaju, pucaju črepi, seno cverči
gori obleka, goriju knige, televizor i radio
gori obed, mleko je prekipelo, čušpajz se sprekuhal

(v jognju krave, kokoši, Đurek i Katica, ptice, kifle, špek i klobasice, postele, gače, ormari, gujdeki, rubače, stare natikače, gumene škornje, poštirkane plahte, vanjkuši, steklo i tanjuri, seno, jarem i kola, cipeliši i perike, vrata i obloki, svete slike, najža, kokoši zaperte v škednju kokodačeju; nemi film, negdo je hitil vračtvo / poldan je, sonce visoko znad rafunga gledi hižicu, škedenj, vse v jognju, vse v jognju, slika je v joku zmeržnjenog jognja zastala)

Stojimo kak drveni kipi, ne čutimo več noge
jeziki se igraju spod sunca
pekel se odperl spod neba
Slon i ja idemo dale po Optujski vulici
polehko, kak da imamo sto let
mali dečec deršče, deršče dečec
greje rokice na soncu, greje rokice na jognju
i njiha se na mestu pred lesom

nad nami črleno-zlatna ptica kriči
hineni, hineni… ja sem fenix koteri lovi požigalce… hineni, hineni

BILJEŠKE

Slon – školski prijatelj; hineni, hineni – (hebr. hee-neh-nee) evo me; fantuješ se – svetiš se; bedenj – kaca; ja sam fenix koteri lovi požigalce – slobodna interpretacija I am a phoenix who runs after arsonists. (Saul Bellow)