Dve rali zmeržnjenoga jognja | Tomislav Ribić

KALIFORNIJA DREMA

Kalifornija drema v mojem bitju / vu vrtu, pod jabukom, hruškom / moja soba je zeleni ocean / oblačim rubaču leta / Kalifornija drema / i to listje kaj polehko opada kak v pesmi grupe The Mamas & the Papas prekriva se z pozabom / Liz več ni tu/ ve z aeroplana gledi brege i puščavu Mojave / ocean kaktusov i agave / od leta je sam ostal škarnicl od levisic zaleplen na zidu znad moje glave / prevelke levisice i lihtplava Ocean Pacifik rubača za surfanje po tenjam preteklosti / ploče Jacksona Brownea i Joan Baez, duha drugačega sveta skrita v mali flašici Harris & Harris parfema od sandalovine i flaša Kahlúa likera

donesla je duhu Kalifornije v to brezmerno leto
pripovedala je o Carole King
Crosby, Stills, Nash & Youngu
i Jacksonu Browneu
tega leta sem napravil svoj prvi krug po Korzu
i počel svet gledeti z drugačeši jočmi
Kalifornija je dremala v meni
na kartam, na slikam, v pismi
odperla je jen drugi svet z svojim pripovedi o velkim cestam
velkim vali, oceanu, o peščanim plažam, o palmam
v mojem malom svetu kaj bi stal v škatulu za šibice
omejenom z vulicom i vrtom
pelal sem ju po dravskim rukavci, bajeri
hoste, groblju, cirkvam
po varaškim pokockanim vulicam kotere kak da su zišle z popevke
Simona & Garfunkla Sound of Silence, otergnjeni zvuk čkomine
Liz i ja v jenom letu na biciklinimi
daleč od fast fooda i Los Angelesa (pri nas ni fast fooda)
daleč od highwaya (tu ni highwaya)
daleč od brezkončnih peščanih plaž
tu je leto na Varteksovim bazeni
tu se dela od šest do dva
tu su susedi kotere poznaš
tu navečer ne raste strah po vulicam od vuličnih bandi
tu je Dravska hosta
četiri, pet slastičarnic
španciranje gor pa dol po Korzu od šest do osem i
v pol devet the end
tu je žitek vusporeni film
ni puno ni rocka ni rola
večer živimo pred televizori
za stolom v kuhinji
na klupici vu vertu
razvlekla je dalšine v meni
navlekla me na Kaliforniju
i onda gda sem se zmislil da bi mogli išče prejti
z biciklini do staroga rimskoga mosta na Plitvici
Liz več ni bila tu
dobil sem nazaj svoju sobu
ve mi je nekak drugača
kak da se Kalifornija preselila v nju

kmica je, oblok je pripret
spuščam drvenu roletu, vugnem firangu
z verta dohaja friški večernji zrak
komarci zujiju
nostalgičen sem gda gledim slike
puščam ploču Diamonds & Rust
Joan Baez popeva Jacksona Brownea Zviranjek žalosti
tonem v nekakov polusen i čutim
duhu Kalifornije, parfem Harris & Harris od sandalovine
duha americana z levisic i majic ni zišla
prešlo bu skoro ovo dugo toplo leto
postal bum brucoš v jesen 1978.
a misli mi buju ostale zaroblene v nepoznatomu hotelu California zanavek

BILJEŠKE

The Mamas & the Papas – američka grupa poznata po pjesmi California Dreamin’ iz 1965.; Sound of Silence – pjesma američkog folk dua Simon & Garfunkel iz 1965.; Joan Baez – američka kantautorica, folk pjevačica, aktivistica; Jackson Browne – američki kantautor; Diamonds & Rust – album Joan Baez iz 1975.; Zviranjek žalosti – pjesma Foutain of Sorrow Jacksona Brownea iz 1974.; Liz – sestrična iz Los Angelesa koja je provela ljeto u Varaždinu; americana – opisivanje kulture Amerike; Hotel California – hit grupe The Eagles iz 1977.; brezmerno – beskonačno