Dve rali zmeržnjenoga jognja | Tomislav Ribić

NOČ GDA JE TOMICA PREMIŠLAL O KMICI NA KONCU VARAŠA BRUCEA SPRINGSTEENA

v noči znad varaša gda sme iskali kmicu na njegovom koncu
vu vse naše norije gda su nam joči bile vekše od mladosti
z dlanov noči se trusila jesen (v sobe, na pola, v nas)
v čkomini hoste gubile se reči
v noči znad varaša gda sme iskali kmicu na njegovom koncu
i skrivali se spred svojih korakov splašeni spod zvezd
gda su vulice bile breskončne srebrne kače
vsako malo sme zestali, vužigali cigaretline
i pripovedali svoje kratke žitke megli i cestam
kaj su se budile pred nami
v noči znad varaša…
vse je vre bilo zaperto
i lese i hiže, obloki, škednji, koci, kerčme

(zmislim se sto duš v iskanju sebe, sto belih tenj v zginutju, v stopu kaj ih prati sto duhov splašenih, sto duš nemirnih v iskanju sebe, na spoterti štreki kresnice im vmivaju joči)

v noči znad varaša gda smo iskali kmicu na njegovom koncu
tam gde trošne hiže pripovedaju z svojim spucali fasadi o smiseli žitka
a stekli cucki se zaletavaju na vse živo kaj prejde po cesti
v grabi na periferiji plašiju se velkih vod Drave kaj im je gerlila pete
nagnuti obloki z kartonom mesto spotertoga glaža skrivaju duhu smerti
znad njih veje hoste prideržavaju meandere zvezdišča
hiža vumetnika na rubu hoste, v rupi, spod Bombellesove štreke skriva
totem černega Jezuša na plavomu stupu, koprive v dvorišču
svetišče nepriznanih, odhičenih, raštrojenih, zgublenih
kaj se doškuljiju po starim bunkeri poleg Drave
i skrivlaju od svetla, kmice, od sebe, vraga i Jezuša v svoji špiritnim odhajanji
duha v zemlenim sobam
tak daleč od hiž od glaža z kristalnimi veji
i metalnim ptiči v krletkam
varaš spi, bogatuni spiju isto kot i siromaki
vesmir probava noč kot želva mlade ptiče, nenadeano
vremenski červ spi v dravskomu pesku več jezero let
ne pomika se
sam ga čuje dravski vodenduh gda se pela znad štreke
z nevidlivom Bombellesovom lokomotivom
v noči brez meseca gda čuješ kak elektrika struji v žicam znad tebe
a vrane bežiju proč preverčujuči se v kmicu
ostaje sam noč, ona černa noč kaj potiho vmira v molitvi
v toplini malih hiž
kaj pripovedaju o odhajanji i dohajanji
vu vrti v koteri cvete ufanje
tam gde ne poslušaju kmicu na koncu varaša Brucea Springsteena
jer kmica je tam doma

BILJEŠKE

Bruce Springsteen – američki kantautor; Darkness on the Egde of Town – ploča B. Springsteena iz 1978.; za zutra – za budućnost; zginutje – iščeznuće (nestati gubeći se u obrisu); doškuljiti – došunjati se; nenadeano – iznenada, neočekivano