Dve rali zmeržnjenoga jognja | Tomislav Ribić

NOČ GDA SEM PELAL BRUCEA SPRINGSTEENA NA BICKLINU ČEZ VARAŠ

noč gda sem pelal Brucea Springsteena na biciklinu čez varaš
krajcali sme se z drugim biciklisti
v našomu nočnomu filmu, v mojim varaškim grafiti
v noči, predi jutra, posli dugoga nočnoga druženja
gda su pluča i telo žejni čistoga zraka
noč gda sem pelal Brucea Springsteena na biciklinu čez varaš
se dole do reke
poleg zaspalih fabrik, nagnutih rafungov
prek mertvih fabričkih štrek
čez hostu kaj spi i senja bolše čase
do reke kaj nosi trage entropije
zestala je na čas da prekrije vutoplenike z venci zelenog krocnja na putu vu večnost
Bruce je čkomel na gepektregeru zamotan skupa z cajtungi
v kuhinjsku kerpu da se neju oškodili omoti teh dveh ploč:
o reki i kmici na koncu varaša
tu noč gda sme se Bruce i ja pelali i hodili po nasipu poleg Drave
zvezde su tkale preju prepruti i vmirale potiho vu viri jutra
leto se šlepalo koncu kot stara kadnjača gda ide na remont
i zmisli se išče kak je hitala iskre i dim
gda se pelala po štreki znad pola polegloga zlata
pelal sem Brucea na bicklinu po prašnavom nasipu žejnom pervoga jesenskoga dežđa
i čutil njegove reči kak da su moje

BILJEŠKE

The River – pjesma B. Springsteena iz 1980.; varaški grafiti – aluzija na film Georga Lucasa Američki grafiti iz 1973.; krocanj – riječna vodena biljka resa, trava; kadnjača – parna lokomotiva